Вазири дифои Русия пешниҳод кардааст, ки Маскав омодагиҳо барои озмоиши силоҳи ҳастаиро фавран оғоз кунад.
Андрей Белоусов 5-уми ноябр дар ҷаласаи Шӯрои амнияти Русия гуфт, ин озмоиш посух ба Иёлоти Муттаҳидаи Амрико аст.
Ба гуфтаи Белоусов, Амрико аз тавофуқҳо барои коҳиши таслиҳот хориҷ шуда, барои сохтани мушакҳои нави қорапаймо бо кулоҳаки ҳастаӣ кор мекунад.
Владимир Путин ба вазоратҳои корҳои хориҷӣ, дифоъ ва мақомоти амниятӣ дастур дод, ки пешниҳодҳои худро барои омодагӣ ба озмоиши силоҳи ҳастаӣ ироа кунанд.
Доналд Трамп охири моҳи октябр ба Вазорати ҷанги Амрико дастури азсаргирии фаврии озмоиши силоҳи ҳастаиро дода буд. Ин тасмим бо вокунишҳое дар сатҳи ҷаҳонӣ рӯбарӯ шуд.
Трамп сабаби чунин тасмимро "барномаҳои озмоишии дигар кишварҳо" донист ва анҷоми ин озмоишҳоро "зарурӣ" гуфт, то Амрико аз рақибони ҳастаиаш ақиб намонад.
Иёлоти Муттаҳида аз соли 1992, Русия аз соли 1990 ва Чин аз соли 1996 озмоиши силоҳи ҳастаӣ анҷом надодаанд.