Акмал Муродов, паҳлавони тоҷик, субҳи имрӯз, 27-уми июл, дар Олимпиадаи Токио дар даври муқаддамотии сабқати ҷудо дар вазни то 81 кило бар Ҷоштер Эндрю аз Гуам пирӯз шуд. Ҳамакнун Акмал дар даври баъдӣ бо Тато Григалашвили аз Гурҷистон рақобат хоҳад кард.

Дар радабандии ҷаҳонӣ Акмал Муродови 25-сола дар зинаи 53-юм ва Тато Григалашвили дар зинаи 3-юм қарор доранд. Теъдоди варзишгарон дар ин вазн 35 нафарро ташкил медиҳад. Тато Григалашвилии 21-солаи номдору пуртаҷриба барандаи медали нуқраи қаҳрамонии ҷаҳон дар соли 2021 дар Маҷористон мебошад. Вай имсол, инчунин дар мусобиқаи устодони ҷудо дар Доҳаи Қатар (Doha Masters 2021) ғолиб шуда, дар Tbilisi Grand Slam 2021 медали биринҷӣ гирифтааст.

Ёдовар мешавем, аз байни паҳлавонони тоҷик аввалин шуда Сомон Маҳмадбеков 26-уми июл дар Олимпиадаи Токио вориди рақобат шуд. Вай дар ду даври муқаддамотии сабқати ҷудо дар вазни то 73 кило бар Аҳмад Аликай аз тими паноҳандагон ва Файе Нҷие аз Гамбия пирӯз шуд, вале дар даври севум аз Рустам Оруҷеви озарбойҷонӣ шикаст хӯрд ва аз ҳаққи идомаи мубориза маҳрум гашт.

Аз байни паҳлавонони тоҷик Комроншоҳи Устопириён 28-уми июл ва Темур Раҳимов 30-юми июл вориди рақобат мешаванд.

Комроншоҳи Устопириён дар вазни то 90 кило ба рақобат аз даври дувум мепардозад. Рақибаш Аксел Клергет аз Фаронса аст, ки дар феҳристи ҷаҳонӣ нисбат ба Комроншоҳ панҷ зина болост (ҷойи 17-ум). Дар ин вазн 33 гуштигир барои ҷоизаҳо талош мекунанд.

Темур Раҳимов дар вазни беш аз 100 кило дар даври аввал бо Энди Гранда аз Куба қувваозмоӣ хоҳад кард. Энди дар феҳристи ҷаҳонӣ нисбат ба Темур се зина поён аст (20-ум). Дар ин вазн 22 нафар сабти ном шудаанд.

Ёдовар мешавем, Баҳодур Усмонов, муштзани маъруфи тоҷик, ки 25-уми июл дар Олимпиадаи Токио дар даври муқаддамотӣ дар вазни то 63 кило бар Леонел Сантоз Нунез аз Доминикан бо ҳисоби 4:1 пирӯз шуд, дар даври баъдӣ бо Элнур Абдураимов, варзишгари қазоқтабори узбекистонӣ, рақобат хоҳад кард.

Ба иттилои сомонаи olympics.com қувваозмоӣ миёни Баҳодур Усмонови 23-сола (либоси сурх) ва Элнур Абдураимови 27-сола (либоси кабуд) рӯзи 31-уми июл соати 12:51 бо вақти маҳаллӣ (8:51 бо вақти Душанбе) шуруъ мешавад.

Элнур Абдураимов барандаи медали биринҷии қаҳрамонии ҷаҳон дар соли 2015 дар Доҳаи Қатар мебошад. Ӯ соли 2017 дар қаҳрамонии ҷаҳон дар Ҳамбурги Олмон мақоми панҷумро касб кардааст. Элнур соли 2017 дар қаҳрамонии Осиё дар Тошканд бо медали тилло сарфароз шудааст. Имсол бошад, дар қаҳрамонии Осиё дар Дубайи Имороти Муттаҳидаи Араб соҳиби медали биринҷӣ гардид.

Баҳодур Усмонов бошад, соли 2019 дар Бангкоки Тайланд ба унвони қаҳрамони Осиё даст ёфтааст. Ӯ имсол дар қаҳрамонии Осиё дар Дубай медали биринҷӣ гирифт. Баҳодур дар қаҳрамонии ҷаҳон соли 2019 дар Екатеринбурги Русия мақоми нӯҳумро касб кардааст.

Қаблан муштзани дигари тоҷик Шаббос Неъматуллоев дар вазни то 81 кило аз Даксианг Чен аз Чин бо ҳисоби 0:4 шикаст хӯрд ва аз ҳаққи ширкат дар даври баъдӣ маҳрум гашт.

Боз як муштзани тоҷик Сиёвуш Зуҳуров рӯзи 29-уми июл дар вазни беш аз 91 кило қувваозмоӣ мекунад. Рақибаш Мурод Алиев аз Фаронса мебошад.

Дар намуди дигар - шиноварӣ ба масофаи 50 метр бо тарзи озод Анастасия Тюрина ва Олимҷон Ишонов 30-юми июл ба рақобат мепардозанд. Илдар Аҳмадиев оид ба варзиши сабук дар давидан ба масофаи 100 метр миёни мардон рӯзи 31-уми июл рақобат хоҳад кард.

Дар Бозиҳои ХХХII тобистонаи олимпӣ Тоҷикистонро даҳ варзишгар намояндагӣ мекунад. Се нафари онҳо – паҳлавон Комроншоҳи Устопириён, шиноварон Анастасия Тюрина ва Олимҷон Ишонов бори дуюм аст, ки ба ҳаққи ширкат дар Бозиҳои олимпӣ мушарраф шудаанд. Ҳарсе дар Олимпиадаи Рио-2016 иштирок карда буданд. Ҳафт нафари дигар бори аввал дар Бозиҳои олимпӣ ширкат меварзанд.

Дар асоси низомномаи Ҷоизаи президенти Тоҷикистон ба ғолибон ва ҷоизадорони мусобиқаҳои байналмилалии варзишӣ ба варзишгароне, ки дар Бозиҳои олимпӣ ҷойҳои аввал, дувум ва севумро сазовор мешаванд, мутаносибан 300 000 сомонӣ, 250 000 сомонӣ ва 200 000 сомонӣ супурда мешавад.

Инчунин шаҳрдори Душанбе Рустами Эмомалӣ ба варзишгароне, ки дар Олимпиадаи Токио медал ба даст меоранд, дар пойтахти кишвар хона туҳфа мекунад. Аз ҷумла, барои медали тилло хонаи чорҳуҷрагӣ, барои медали нуқра хонаи сеҳуҷрагӣ ва барои медали биринҷӣ хонаи дуҳуҷрагӣ тақдим мегардад.

Бозиҳои тобистонаи олимпӣ дар Токио, ки 23-юми июл шуруъ шуд, то 8-уми август идома хоҳад кард. Олимпиада мебоист соли гузашта баргузор мешуд, аммо ба иллати пандемияи коронавирус барои як сол мавқуф гузошта шуд.

Наздиконаш рӯзи 12-уми сентябр дар суҳбат бо Радиои Озодӣ гуфтанд, ки ӯ аз дарди ҷигар ранҷ мекашид ва чанд ҳафтаи ахир дар бемористон бистарӣ буд.

Абдулқодири Раҳим бо навиштани ҳикояҳои кутоҳ ва шеър дар сабки Бедил маъруф шуд.

Ӯ соли 1961 дар деҳаи Кафтархонаи ноҳияи Восеъ ба дунё омадааст.

Дар ҳикояҳояш зиндагии замони кӯдакӣ, аз ҷумла пахтакории иҷборӣ, заҳрпошӣ ба пахтазор, ки ба сокинон зиён меовард ва гирифтории сокинони ин минтақа ба бемории силро ба тасвир кашида буд.

Китоби шеъру ҳикояҳояш бо номи “Дурӯғи шабнам”, “Чароғи ошноӣ”, “Ҷилваи як нола”, “Нусхаи парешонӣ”, “Рӯшноӣ”, “Фиреби меҳр”, “Хилвати оина”, “Духтари афсонаҳо”, “Пайванди марзҳо ва дилҳо”, “Домони абр”, “Ашки сари мижгон”, “Назари лутф” чоп шудаанд.

Ӯ то охирин лаҳзаи умр дар “Ҷумҳурият”, нашрияи расмии ҳукумати Тоҷикистон кор мекард ва бештар дар мавзуҳои адабӣ хабару мақола менавишт.

Дар ин бора рӯзи 12-уми сентябр як манбаи хабаргузории Рейтерс иттило додааст.

Сушила Карки, собиқ раиси низоми адлия ё Додгоҳи олии Непал эҳтимолан раҳбарии муваққатии ҳукуматро ба ӯҳда хоҳад гирифт, чун ин курсӣ баъди дар пайи эътирозҳои шадиде тарки мақоми нахуствазирӣ кардани Шарма Олии коммунист холӣ мебошад.

Кишвари Непал, воқеъ дар байни Ҳинду Чин ва дар байни кӯҳҳои Ҳимолой, дар як ҳафтаи гузашта бо бесобиқатарин беназмиҳо дар таърихи ин давлат рӯбарӯ шудааст. Эътирозҳои мардумӣ, ки баъди манъи шабакаҳои иҷтимоӣ шурӯъ шуд, боиси кушта шудани 51 нафар ва ҷароҳати 1300 кас гардид. Мавҷи хушунатҳо танҳо баъди аз қудрат канор рафтани Олӣ хомӯш гардид.

Карки 73 сол дошта, аввалин занест, ки раҳбарии Додгоҳи олиро ба ӯҳда дошт ва дар миёни тарафдоронаш – ширкатдорони ҳаракати Gen-Z, ки дар садри эътирозҳо қарор доштанд, барои ҳақиқатҷӯӣ, муттаҳидӣ ва муборизааш зидди коррупсия ситоиш мешавад.

Мақомоти дигари амалкунанда дар Непал аз шарҳи мавзӯи таъини Карки худдорӣ кардаанд.

Дар давлати Непал соли 2008 монархия аз байн бурда шуд, вале аз он замон давраи бесуботии сиёсиву иқтисодии он оғоз гардид ва мардуми зиёди бекоре барои ҷустуҷӯи даромад ба давлатҳои хориҷӣ муҳоҷир шуданд.

Хабарнигори оҷонсии Ройтерз аз шаҳри Катманду иттило медиҳад, ки рӯзи ҷумъа дар пойтахт нишонаҳои дубора оддӣ шудани вазъ мушоҳида мешавад ва фурӯшгоҳҳо аз нав дарҳои худро боз карда, мошинҳо ба ҳаракат медароянд ва дар дасти полис дигар силоҳ дида намешавад. Вале ҳамоно баъзе роҳҳо баста буда тартиботро сарбозон назорат мекунанд. Мақомот ба дасти хонаводаҳо супурдани ҷасадҳоро шурӯъ кардаанд.

Сухангӯи полис гуфт, дар миёни 51 кушташуда дар як ҳафтаи ахир 21 эътирозгар, нӯҳ маҳбус, се ходими полис ва 18 нафари то ҳол ношинос мебошанд.

Рӯзи 11-уми сентябр Додгоҳи олии Бразилия эълон кард, ки гуноҳи раҳбари пешини кишвар дар табаддулоти давлатӣ исбот шудааст. Ба гуфтаи додгоҳ, Жаир Болсонару дар интихоботи соли 2022 мағлуб шуд, вале бо роҳи ғайриқонунӣ талош дошт, раҳбари давлат шавад.

Он сол ӯ дар муқобили сиёсатмадори чапгаро Лула да Силва мағлуб шуда буд. Баъди маросими савгандёдкунии Силва тарафдорони Болсонару талош карданд биноҳои парлумон, Додгоҳи олӣ ва қароргоҳи раҳбари давлатро ғасб кунанд. Дар натиҷа, бар асоси моддаи талоши табаддулоти давлатӣ парванда боз шуд.

Ба Болсонару бар асоси панҷ модда, яке - ташкили созмони ҷиноӣ бо ҳадафи аз қудрат барканор кардани раҳбари кишвар, айб эълон карданд. Президенти собиқ ин иттиҳомҳоро рад кардааст.

Жаир Болсонару 70 сол дорад ва ҳукми содиршуда ба ӯ баробар бо ҳукми ҳабси абад дониста мешавад.

Вазорати корҳои дохилии Русия аз ин ба баъд маълумоти муҳоҷиронеро, ки пас аз ихроҷ ному насаби худро иваз карда, дубора ба ин кишвар ворид мешаванд, ба Хадамоти махсуси бехатарӣ ё ФСБ, ирсол мекунад.

Хабаргузории русии ТАСС бо истинод ба тартиби навшудаи қабули қарори ҳукумат дар дар бораи манъи вуруд, менависад, ки Вазорати корҳои дохилӣ ва мақомоти марзбонӣ бояд аз 1 марти соли 2026 ба ФСБ маълумот дар бораи тағйири насаб, ном, номи падар ё санаи таваллуди шаҳрвандони хориҷиеро, ки аллакай вурудашон ба ин кишвар манъ аст, пешниҳод кунанд.

Мақомот дар шарҳи ин қарор навиштаанд, ин барояшон имкон медиҳад, ки феҳристи вуруди шахсони номатлубро тартиб дода, чунин шаҳрвандонро ҳанӯз дар марз шиносоӣ кунанд.

Ҳудуди як миллион сокини Тоҷикистон дар Русия муҳоҷиранд. Танҳо соли гузашта, ба гуфтаи мақомоти тоҷик, беш аз 30 ҳазор муҳоҷирро аз ин кишвар ихроҷ карданд ва фишору азияти муҳоҷирон дар ин кишвар идома дорад.

Кумитаи ҳолатҳои фавқулодаи Тоҷикистон аз наҷоти як шаҳрванди Русия дар ағбаи Чимтарға хабар додааст.

Ба иттилои ин ниҳод, Антон Вениаминович ҳангоми саёҳат дар ҳудуди деҳаи Ворӯи Панҷакент аз кӯҳ лағжида, ҷароҳат бардоштааст.

"Ҳангоми санҷиш маълум гардид, ки сайёҳ ҳангоми лағжиш аз баландӣ пойаш шикастааст. Ба ӯ дар ҷойи ҳодиса кӯмаки аввалияи тиббӣ расонида шуд",- афзудааст манбаъ.

Ба иттилои КҲФ, айни ҳол ин шаҳрванди Русия таҳти назорати табибон қарор дорад.

Дар гузашта ҳам шуморе аз сайёҳони хориҷӣ дар минтақаҳои баландкӯҳи Тоҷикистон дармонда, кормандони Кумитаи ҳолатҳои фавқулода онҳоро наҷот дода буданд.

Рӯзи 11-уми сентябр тарҳи қонуни тағйири номи ин шаҳр барои имзо ба Содир Ҷабборов, президенти Қирғизистон фиристода шуд.

Ҷалолобод, маркази маъмурии вилояти Ҷалолобод аст ва ин номро ҳанӯз аз солҳои 1930-юм доштааст. Сабаби тағйиротро аъзои маҷлис расман дар муроҷиати дастаҷамъонаи сокинон ва зарураташро дар ҳимояти манфиат ва идеологияи миллӣ номиданд.

Манас, қаҳрамони достони маъруфи мардуми қирғиз аст.

Ӯ рӯзи 10-уми сентябр дар як маросиме дар донишгоҳи Юта аз тири силоҳ кушта шуд.

Кирк як тарафдори бонуфузи президенти ҷумҳурихоҳ Доналд Трамп ва муассиси созмони муҳофизакор ва сертарафдори ҷавонон бо номи “Нуқтаи гардиши Амрико” буд. Дар наворҳои видеоӣ дида мешавад, ки Кирк дар миёни издиҳоми бузурги мардум суханронӣ мекунад ва дар ҳамин лаҳза ҳадафи тир қарор мегирад. Ҳозирон аз ин ҳолат ваҳшатзада мешаванд.

Кирк ва созмонаш “Нуқтаи гардиши Амрико” барои таблиғи ҷавонон дар моҳи ноябри соли гузашта бисёр фаъол буд ва нақши боризе дошт.

Ҳодисаи кушта шудани Чарли Киркро рӯзи 10-уми сентябр президент Доналд Трамп ҳам дар саҳифаи худ дар шабакаи иҷтимоии Truth Social хабар дод. Ӯ, аз ҷумла, навишт: “Ҳамватанони бузурги амрикоиам, аз хабари сӯиқасд ба ҷои Чарли Кирк дар коллеҷи Юта қалбам пур аз ғам ва хашм шудааст. Чарли миллионҳо нафарро ташвиқ кардааст ва имшаб ҳамаи онҳое, ки ӯро медонистанду дӯсташ медоштанд, ваҳшатзада шудаанд. Чарли як ватандӯсте буд, ки ҳаёташро барои эҷоди мубоҳисаҳои боз ва ҳам барои кишвари дӯстдоштааш – ИМА қурбон кард. Ӯ барои озодӣ, демократия, адолат ва мардуми Амрико мубориза бурдааст. Ӯ як шаҳиди роҳи ҳақиқат ва озодӣ аст”.

Баъди нашри ин изҳороти Трамп парчами ИМА дар бинои Кохи Сафед то нисф поин оварда шуд. Кирк ва созмонаш “Нуқтаи гардиши Амрико”, ки онро бузургтарин созмони муҳофизакори ҷавонон дар ин кишвар меноманд, барои ҷалби раъйдиҳандагони ҷавони тарафдори Трамп дар интихоботи моҳи ноябр нақши муҳиме бозидааст.

Исроил рӯзи 10 сентябр шаҳри Санъо, пойтахти Яман ва вилояти Ал-Ҷавф дар шимоли ин кишварро, ҳадаф қарор дод. Вазорати тандурустии ҳукумати ҳусиҳо мегӯяд, ки бар асари ин ҳамлаҳо 35 нафар кушта ва 131 тани дигар захмӣ шудаанд.

Артиши Исроил тасдиқ кардааст, ки мавзеъҳои ҳусиҳоро дар Яман, аз ҷумла, пойтахтро ҳадаф қарор додааст. Дар баёнияи артиши Исроил аз рӯзи 10 сентябр омадааст, нерӯҳои ҳавоии Исроил пойгоҳҳои ҳусиҳоро дар Санъо ва Ал-Ҷавф, ҳадаф қарор доданд.

Баёнияи артиши Исроил мегӯяд, ки дар ин ҳамлаҳо пойгоҳҳои низомӣ, маркази матбуотии ҳусиҳо ва як анбори маводи сӯхт, ҳадаф қарор дода шуд.

Шоҳидони айнӣ гуфтанд, бинои Вазорати дифои ҳукумати ҳусиҳо ҳадафи ҳамлаҳо буд.

Сокинони Санъо ба хабаргузории "Рейтерз" гуфтанд, ки ҳамлаи Исроил ба як махфигоҳ миёни ду кӯҳ сурат гирифтааст, ки ҳамчун қароргоҳи фармондеҳӣ ва назорат истифода мешавад. Мизони хисорот то кунун маълум нест.

Радиои артиши Исроил гузориш дод, ки аз ҷумлаи ҳадафҳои ин ҳамла, қароргоҳи аслии ҳусиҳо ва пойгоҳҳои низомии онҳо будааст.

Беш аз як сол мешавад, ки Исроил ва ҳусиҳои Яман ба ҳавопаймоҳо ва паҳбоду мушакҳо ба якдигар ҳамла мекунад.

Гурӯҳи ҳусиҳои Яман, ки аз сӯи Эрон пуштибонӣ мешаванд, қаблан киштиҳоеро дар Баҳри Сурх ҳадаф қарор доданд ва ва онро нишонаи ҳамбастагӣ бо фаластиниҳо дар Ғазза, хонданд.

Як чархболи Толибон рӯзи 10 сентябр дар вилояти Ғур сарнагун шудааст. Дар наворе, ки аз сӯи манбаъҳои маҳаллӣ ба Радиои Озодӣ расид, дида мешавад, ки чархбол дар як минтақаи куҳистонӣ суқут мекунад.

Манбаъҳои маҳаллӣ ба бахши афғонистонии Радиои Озодӣ гуфтаанд, ки ин чархбол пас аз боздиди муовини вазири маъдани Афғонистон ва волии Ғур аз як кони сурб дар минтақаи Лаълбандон, ҳангоми бозгашт ба шаҳри Фирӯзкуҳ, маркази вилояти Ғур, дучори сонеҳа шудааст.

Ба гуфтаи манбаъҳо, се халабон захмӣ шудаанд, аммо дигар сарнишинон осеб надидаанд. Сухангӯи раиси вилояти Ғур бо тасдиқи ин ҳодиса ба Радиои Озодӣ гуфт, ки ҳеҷ кас осеб надидааст.

Вазорати корҳои дохилии Русия бо пахши иттилоияе аз анҷоми мӯҳлате, ки барои қонунигардонии будубоши муҳоҷирон дар Русия ҷудо шуда буд, хабар додааст.

Ба иттилои манбаъ, шурӯъ аз имрӯз, 11 сентябр нисбати хориҷиёне, ки ин корро накарданд, ихроҷ ва дигар чораҳои пешбининамудаи қонун, аз ҷумла вуруд ба Русия дар оянда, татбиқ хоҳанд шуд.

Дар асоси фармони Владимир Путин, раисиҷумҳури Русия, хориҷиёне, ки дар ин кишвар ғайриқонунӣ кору зиндагӣ доранд, мебоист то 10-уми сентябр санадҳои худро дуруст кунанд.

Сабти ном дар идораи муҳоҷират, пешниҳоди маълумоти биометрӣ ва пизишкӣ, шаҳодатномаи донистани забони русӣ ва иҷозаи иқомат, аз шартҳои асосӣ гуфта мешаванд.

Ҳамчунин, муҳоҷирон бояд ҷаримаҳо ва пули телефонро пардохт карда бошанд ва аз хадамоти дигари давлатӣ, қарздор набошанд.

Дар Туркманистон 15 корманди фурудгоҳи шаҳри Дашоғузро барои рақсидан дар назди акси раиси ҷумҳур Сардор Бердимуҳаммадов аз кор рондаанд. Дар ин кишвар аксҳои Қурбонгулӣ Бердимуҳаммадов, раиси ҷумҳури пешин, ки соли 2022 қудратро ба писараш Сардор супурд, “муқаддас” ба ҳисоб мераванд.

Бино ба хабарҳои дарёфтии бахши туркмании Радиои Озодӣ, ҳодиса 15-уми август рух додааст. Нимашаби ҳамон рӯз афсарони Кумитаи амнияти миллии Туркманистон 15 корманди фурудгоҳи Дашоғузро ба ҷойи корашон даъват кардаанд ва ба онҳо амр додаанд, ки ариза бинависанд, ки “бо ихтиёри хеш аз кор мераванд”, аммо сабаб “рақс дар як ҷойи номуносиб” будааст.

Бино ба гузоришҳо кормандони фурудгоҳ дар соати корӣ зодрӯзи яке аз ҳамкоронро ҷашн гирифта, дар рӯ ба рӯи акси раиси ҷумҳур рақсидаанд ва яке аз онҳо аксро дар ТикТок гузоштааст.” Ҳамаи онҳое, ки рақс кардаанд, аз кор ронда шудаанд ва муаллифи наворро ҳам барои 15 рӯз паси панҷара фиристодаанд. Мақомоти расмӣ кормандони фурудгоҳро ба “ҳаракатҳои масхараомез” дар назди акси раиси ҷумҳур муттаҳам кардаанд.

Як манбаъ дар мақомоти амниятии Туркманистон ба бахши туркмании Радиои Озодӣ гуфтааст: “Аксҳои раиси ҷумҳур ва падари ӯ муқаддас ба ҳисоб мераванд. Муҳим нест, шумо чӣ мақоме доред, агар дар назди аксҳо рафтори нодурусте кардед, аз кор ронда мешавед ва ё ҳатто ба зиндон меравед. Ин як навъ қонуни нонавишта аст.” Дар фурудгоҳи Дашоғуз ин ҳодисаро шарҳ надодаанд.

Дипломати шинохта ва муовини собиқи вазири умури хориҷии Узбекистон мегӯяд, аз ӯ батакрор талаб доранд, ки муоинаи ҳатмии тиббииро барои бемории норасоии масунияти бадан бигзарад.

Алишер Файзуллоев, ки чанде пеш аз хориҷа баргаштааст дар саҳифаи худ дар Фейсбук навиштааст: “Чанд рӯз боз аст, ки парастори шифохонаи ноҳиявӣ бо исрор аз ман мехоҳад, ки барои бемории ВИЧ ва сифилис хун супорам, чун аввали имсол бештар аз се моҳ дар хориҷ будам.”

Ба навиштаи профессори улуми сиёсӣ, Алишер Файзуллоев, ки сафири собиқи Узбекистон дар кишварҳои аврупоӣ ҳам буд, талаби парастор зоҳиран ба қонуне вобаста аст, ки порлумони Узбекистон рӯзи 1-уми август қабул кард. Бар асоси ин қонун, муоинаи тиббии муҳоҷирон, ё онҳое, ки аз 90 рӯз бештар дар хориҷ будаанд, ҳатмӣ аст. Ба қавли донишманди узбек, фақат ба касони аз 18 то 60-сола рабт дорад, на ба ӯ, ки 68-сола шудааст.

Ҳадафи қонун ошкор кардани бемории ВИЧ/СПИД ё вируси норасоии масунияти бадан, сил ва ё бемориҳои дигари сироятии хатарнок барои аҳолӣ гуфта шудааст. Агарчӣ ин санад ҳоло ҳукми иҷро нагирифтааст, вале ба гуфтаи шаҳрвандоне, ки ба Узбекистон баргаштаанд, аз онҳо талаб ва ё маҷбур мекунанд, ки муоинаро бигзаранд.

Вазорати корҳои хориҷии Тоҷикистон ҳамлаи Исроил ба пойтахти Қатарро маҳкум кард.

Ин вазорат рӯзи 10 сентябр бо нашри як изҳорот ҳамлаи Исроил ба пойтахти Қатарро "таҷовуз ба тамомияти арзии Давлати Қатар" хонд ва онро "қотеона" маҳкум кард.

Ҷониби Тоҷикистон ин амали Исроилро "нақзи возеҳи қонунҳои байналмилалӣ ва унсурҳои бунёдии СММ гуфтааст, ки "ташаннуҷи вазъи бе ин ҳам мураккаби минтақаи Ховари Миёнаро афзоиш медиҳад".

Тоҷикистон аз ин қабл ҳамлаҳои Исроил ва Амрико ба Эронро маҳкум карда буд.

Нерӯҳои ҳавоии Исроил рӯзи 9 сентябр ба қароргоҳи гурӯҳи "Ҳамос" дар шаҳри Давҳа, пойтахти Қатар ҳамла карданд.

Гурӯҳи "Ҳамос" дар баёнияе эълон кард, ки дар ин ҳамла 5 тан аз аъзои ин гурӯҳ, аз ҷумла, писари раҳбари ҳайати музокиракунандаи ин гурӯҳ Халил Ҳайя ва раиси дафтари ӯ, кушта шуданд. Аъзои ҳайати музокиракунандаи "Ҳамос" аз ин ҳамла ҷони солим бадар бурдаанд.

Бисёре аз кишварҳои ҷаҳон ин ҳамлаи Исроилро маҳкум карданд.

Артиши Исроил дар баёнияе гуфтааст, афроде, ки дар ин ҳамла ҳадаф қарор гирифтанд, солҳо гурӯҳи "Ҳамос"-ро раҳбарӣ мекарданд ва ба таври мустақим масъули иҷрои ҳамлаи 7 октябри соли 2023 ба хоки Исроил буданд.

Мақомоти пулис се ҷавондухтари гумшударо мақомот пайдо карда, ба волидонашон баргардонданд.

Раёсати Вазорати корҳои дохилӣ дар вилояти Хатлон мегӯянд, ин духтаронро, ки дар ноҳияи Хуросон гум шуда буданд, кормандони онҳо дар ҳудуди шаҳри Душанбе пайдо карданд.

Хабари гум шудани ин се ҷавондухтар охири ҳафтаи гузашта дар шабакаҳои иҷтимоӣ роҳ ёфт. Наздикони онҳо бо гузоштани аксу навор аз мардум хоҳиш карда буданд, то барои пайдо намудани онҳо кӯмак кунанд.

Мақомот мегӯянд, Зуҳрои 16-сола ва Сумани 17-сола, хонандагони синфҳои 10 ва 11, рӯзи 4-уми сентябр ба мактаб рафта, ба хона барнагаштанд.

Ба иттилои манбаъ, онҳо бо нафари сеюм бо номи Нозия Ёрзодаи 18-сола, сокини ҳамин ноҳия, бедарак ғайб заданд.

Ҷузъиёти бештар дастрас нест, аз ҷумла маълум нест, ки чӣ гуна онҳо аз ноҳияи Хуросон ба Душанбе омаданд ва чаро давоми чанд рӯз бо волидайн дар тамос набуданд.

Танҳо дар моҳи апрели имсол пулиси шаҳри Душанбе хабари гум шудани даҳ наврасро нашр кард. Ҳарчанд баъзе аз онҳо бо гузашти чанд рӯз ёфт шуданд, сабаби нопадид шудани онҳо гуфта намешавад.

Корбарони шабакаҳои иҷтимоӣ онро ба эътироз аз вазъи хонавода, фиреби ҳамсолон, моҷароҷӯӣ ва ғайра, бастагӣ медиҳанд.

Форум-18, як расонае, ки масоили ҳуқуқи динӣ ва мазҳабиро инъикос мекунад, гуфтааст, ки маъмурони пулиси Узбекистон ҳафтаи гузашта 6 марди шиамазҳабро дар Самарқанд боздошт карда, барои бозпурсӣ бурдаанд.

Дар гузорише, ки Форум 18 рӯзи 8-уми сентябр нашр кардааст, гуфта мешавад, ки маъмурони пулис ва идораи мубориза бо ифротгароӣ субҳи 3-уми сентябр бидуни иҷоза ба хонаи ин шаш нафар ворид шуда, ҷустӯҷу кардаанд ва ҳамаи онҳоро барои бозпурсӣ бурдаанд. Чанде аз сокинони маҳалла ба Форум 18 гуфтаанд, ки ҳамаи ин афрод баъди муддати кутоҳе раҳо шудаанд ва дар байни онҳо се нафаре будаанд, ки моҳи май ҳам барои эътиқоди диниашон боздошт шуда буданд.

Ба навиштаи Форум 18, Бахтиёр Раҳимов ва бародараш Шерзод Раҳимов ва фарди дигаре бо номи Иброҳим Иброҳимов аз ҷумлаи чаҳор нафаре ҳастанд, ки кормандони милиса онҳоро баҳори имсол дастгир ва шиканҷа кардаанд. Онҳоро баъдан барои нофармонӣ ба кормандони давлат ва авбошӣ муттаҳам карда, чанд шабонарӯзӣ ҳабс кардаанд.

Ба гуфтаи Форум 18 аз моҳи май то кунун маъмурони амниятии Узбекистон ба зидди шиамазҳабон дар Самарқанд амалиёт анҷом дода ва аз баъзе аз онҳо пурсидаанд, ки “чаро барои баррасии дин як гурӯҳи чатҳои "ғайриқонунӣ" таъсис додаанд ва чаро бархе аз аъзои ин гурӯҳ дар хориҷа ҳастанд.” Форум 18 аз қавли чанде аз онҳо навиштааст, ки "танҳо мавзӯъҳои мазҳабии марбут ба паёмбар Муҳаммад, имомҳо ва пояҳои мазҳаби шиъаро баррасӣ карданд." Ба қавли мусоҳибони Форум 18, азбаски “имкони расмии омӯзиши мазҳаби шиъа вуҷуд надорад, маркази омӯзишӣ, мактабҳо ва мутахассиси расман эътирофшуда барои таълими мазҳаб вуҷуд надорад, аз ин рӯ одамон гурӯҳи Telegram-ро таъсис доданд."

Ба навиштаи Форум 18, ҷамоатҳои динӣ дар Узбекистон бидуни сабти расмӣ иҷозаи фаъолият надоранд ва иҷрои ойинҳои динӣ ба таври дастаҷамъӣ ғайриқонунӣ аст.” Дар мақола омадааст: “Мақомот ҳамчунин дархости сабти номи ҷамоаҳои мусалмонӣ ба мисли шиъаҳо ва онҳоеро, ки мехоҳанд берун аз муфтиёти таҳти назорати давлат фаъолият кунанд, рад мекунанд.” Форум 18 навиштааст, ки мақомоти Узбекистон ба тақозоҳои батакрори ин созмон барои шарҳи ин қазияҳо ҷавобе надодаанд.